Honda Civic-ზე დაფუძნებული Lamborghini Reventon-ის ასლი 25 000$ ღირს

თუ 25 000$ გაქვთ და ავტომობილს ეძებთ, მაშინ უამრავი არჩევანი გექნებათ. თუ შედარებით ახალი მანქანა გსურთ და დიდი მოთხოვნები არ გაქვთ, მაშინ ამ ფასად ახალი Honda Civic-ი და Mazda CX30-იც მოგივათ. თუმცა, რა ხდება მაშინ, როდესაც „სუპერქარები“ მოგწონთ და მათ შესაძენად საჭირო მრავალი ასეული ათასი დოლარი არ გაქვთ? ასეთი ადამიანებისთვის სურათზე ნაჩვენები - Civic-ზე დაფუძნებული - Lamborghini Reventon-ის ასლი არსებობს.

ეს ავტომობილი ახლა Autoway of Atlanta-ს მიერ აშშ-ში იყიდება. როგორც ჩანს, მის წინა მფლობელს სურდა შეექმნა ისეთი მანქანა, რომელსაც Lamborghini-ის უიშვიათესი მოდელისგან ვერ გაარჩევდნენ (დიახ, ამ ყველაფერს ხუმრობით ვწერთ).

Reventon-ს მიმსგავსებული კორპუსი 2009 წლის FG-თაობის Civic-ზეა დაფუძნებული. ქარხნული პანელები ფიბერისგან დამზადებული პანელებით ჩანაცვლდა. Reventon-ს ყველაზე მეტად წინა მხარე ჰგავს, რადგან ბამპერს ზუსტი კონტურები აქვს. წინა მაშუქები Toyota Celica-სთვის გამოშვებული არაქარხნული მაშუქებია, რომელიც Lambo-ს ხასიათის იმიტაციისთვის გამოდგება.

უკანა მხარე უფრო სასაცილოა. შეხედეთ გამოკვეთილ უკანა ბამპერს და მაშუქებს. ყველაზე საინტერესო ფორმა კი მაყუჩებს აქვს. Civic-ი „სუპერქარს“ მაკრატელისებრი კარებითაც ჰყავს. უზარმაზარ ფრთებს ქრომირებული დისკები ავსებს. ეს მანქანა ინტერიერშიც Lamborghini-ა. სავარძლები ნაცრისფერ ფერშია გადაწყვეტილი, ხოლო საზურგეებზე და შიდა პანელებზე Lamborghini-ის ლოგოებია დატანილი. ეს იმისთვის, რომ გახსოვდეთ, რა რაკეტაშიც სხედხართ.

ამ რაკეტას V12 ძრავა არ აქვს. კაპოტის ქვეშ 1.8-ლიტრიანი, ატმოსფერული VTEC აგრეგატია, რომელიც Lamborghini-ის ლეგენდარულ 12-ცილინდრიან ძრავას ასი თავით სჯობს (თუ ჩვენი არ გჯერათ, Civic-ის გულშემატკივრებს ჰკითხეთ) და 212 000კმ აქვს ნამუშევარი.

შეიძენდით ამ ავტომობილს? იქნებ მის გაუმჯობესებას შეეცდებოდით? დაწერეთ თქვენი აზრი კომენტარებში.