მსოფლიოში ყველაზე სწრაფი „ოპელის“ ორი ეგზემპლარი გასაყიდადაა გამოტანილი

მსურველებს ისტორიაში ყველაზე სწრაფი და დაუფასებელი სედანების ფლობა შეუძლიათ.

Opel Lotus Omega ერთ-ერთი ყველაზე სწრაფი სპორტული სედანია, რაც ოდესმე შექმნილა. 1992 წელს გამოსულ ავტომობილს 377 ცხენის ძალა ჰქონდა და 281 კმ/სთ-ის განვითარება შეეძლო. ახლა კი ამ მოდელის ორი ეგზემპლარი ფლორიდის სადილეროში გასაყიდადაა გამოტანილი.

ამ მანქანების სახელწოდება Lotus Carlton-ი არ არის. ეს Omega-ას ეგზემპლარებია, რაც ნიშნავს, რომ მარცხენასაჭიან ვერსიებთან გვაქვს საქმე. Lotus Omega Carlton-ს ჩვენ ბლოგიც მივუძღვენით, რომლის გახსნასაც ამ ლურჯ სიტყვებზე ხელის დაჭერით შეძლებთ. მოკლედ რომ გითხრათ, ეს იყო ავტომობილი, რომელიც თავისი დროის „სუპერქარებს“ სისხლს უშრობდა.

საკმაოდ ჩვეულებრივ Opel Omega-ს ან Vauxhall Carlton-ის სედანზე დაფუძნებული მოდელი მნიშვნელოვნად იყო მოდიფიცირებული. ინჟინრებმა მას ძრავა გაუუმჯობესეს. დაამატეს ტურბინებიც. სამუხრუჭე სისტემა 4-დგუშიანი სუპორტებით გააძლიერეს. 3.6-ლიტრიანი ძრავიდან წამოსულ სიმძლავრეს კი 6-სიჩქარიანი მექანიკური კოლოფი უკანა ღერძზე ანაწილებდა.

მონაცემებისა და შესაძლებლობების გარდა, Lotus Carlton-ის ან Omega-ს რეპუტაციაზე ამ მანქანების გამოყენებასაც ჰქონდა გავლენა. 1990-იანებში Lotus Carlton Omega-ს პოლიციის ვერც ერთი მანქანა ეწეოდა, რის გამოც მძარცველები  ამ ავტომობილებით წარმატებით გარბოდნენ. ბრიტანეთში Lotus Carlton-ის შეძენის აკრძალვაზეც იყო საუბარი.

მოიხიბლეთ, არა? სწორედ ეს მანქანებია ახლა გამოტანილი ფლორიდის ერთ-ერთ სადილეროში. ერთ-ერთ ეგზემპლარს 70 000 მილი (112 000 კმ) აქვს გარბენი და 69 850$-ად არის შეფასებული. განცხადებიდან ვიგებთ, რომ ეს ეგზემპლარი უმეტესი დრო საფრანგეთში ჰყავდათ. აშშ-ში კი 3 წლის წინ მოხვდა.

მეორე Omega საკოლექციოდ უფრო გამოდგება. მისი ოდომეტრი 36 500 მილს (58 741 კმ) აჩვენებს. ფასი 84 000$-ს აჭარბებს. მანქანას მხოლოდ ერთი მფლობელი ჰყავდა და სერვისი მუდმივად Opel-ის სადილეროში უტარდებოდა.

ორივე ავტომობილი „ბრიტანულ სარბოლო მწვანეშია“ შეღებილი და შავი ფერის ინტერიერი აქვს.

შეიძენდით ამ ავტომობილებს მითითებული თანხის სანაცვლოდ? დააფიქსირეთ თქვენი აზრი კომენტარებში.