რომელი მარკის მფლობელები ჯარიმდებიან ყველაზე ხშირად სიჩქარის გადამეტებისთვის?
როგორც უახლესი კვლევებითაც დასტურდება და თან, ალბათ ბევრისთვის გასაკვირიც არ არის, აშშ-ში სიჩქარის გადამეტებისთვის ყველაზე ხშირად სწორედ BMW-ის მძღოლები ჯარიმდებიან. თუმცა, სადაზღვევო პროვაიდერ Insurify-ის უახლეს ანგარიშმა ერთი უცნაური ფაქტი მაინც გამოავლინა. კერძოდ კი, დადგინდა, რომ დამნაშავეთა შორის ყველაზე მეტჯერ არა უშუალოდ BMW-ს. არამედ მისი ერთ-ერთი მოდელის, i3-ის მძღოლები ირიცხებიან.
კვლევა, ჯამში 4.6 მილიონი სადაზღვევო აპლიკაციის შევსების პროცესში, მომხმარებელთა მიერ მოწოდებულ მონაცემებზე დაყრდნობით ჩატარდა. უახლესი მაჩვენებლით, მცირე ზომის ელექტრო ჰეჩბექის, i3-ის მფლობელთა 17.6% სიჩქარის გადაჭარბებისთვის ერთხელ მაინც დაუჯარიმებიათ. ამის მიუხედავად, განსხვავებული სიტუაცია გვხვდება Z4 Roadster-ის მფლობელთა შემთხვევაში, რომელთა მხოლოდ 4.5% დაუჯარიმებიათ იმავე მიზეზით. პარადოქსია, არა?
საინტერესოა ისიც, რომ როდესაც საქმე უშუალოდ ავტომწარმოებლებს შეეხებათ, ამ კონკრეტული რეიტინგის ათეულში არცერთი ამერიკული მარკა არ გვხვდება. რეალურად შედეგები შემდეგნაირია: Insurify-ის მონაცემებით, სიჩქარის მოყვარული მძღოლებით რეიტინგის ათეულში 5 ადგილით იაპონური, სამით გერმანული, ორით კი - კორეული ავტომწარმოებელია წარმოდგენილი.
სიჩქარის ჯარიმების მიხედვით, ავტომწარმოებლების სიაში პირველ ადგილზე Infiniti-ის მძღოლები არიან. მათ შორის ყველაზე ცუდ შედეგს G37-ის მფლობელები აფიქსირებენ - მათი სულ მცირე 10.7% მაინც მოხვედრილა წარსულში სიჩქარის გადაჭარბების გამო დაჯარიმებულთა რიგებში. Scion-ი კი შესაძლოა თავად მკვდარი იყოს, მაგრამ მათ მძღოლებს იმავე ტერმინით ნამდვილად ვერ მოვიხსენიებთ. პირიქით, Scion-ის მფლობელები ტრასაზე ზედმეტად აქტიურებიც არიან. მათი დაახლოებით 8.4% წარსულში დაჯარიმებულა სიჩქარის გადამეტებისთვის, ყველაზე ცუდი მძღოლები კი ამ მხრივ FR-S-ის მფლობელები არიან.
მესამე ადგილზე Volkswagen-ია (8.3%), სიჩქარის ლიმიტის დაცვა ყველაზე მეტად Golf GTI-ის (11.1%) მძღოლებს უჭირთ, და კიდევ ერთხელ, ხუთეულის მიღმა არ დარჩა Subaru-ც (8%), განსაკუთრებით დაუმორჩილებელი WRX-ის (13.6%) მძღოლებით. და მაშინ, როდესაც Mazda MX-5-ის (9.2%) მძღოლებს დიდად სიჩქარის კონტროლი არ უყვართ, ყველაზე კანონმორჩილნი ამ მარკის მომხმარებლებს შორის Mazda3-ის (4.3%) მფლობელები აღმოჩნდნენ.
გამოკითხვის საფუძველზე ყველაზე კანონმორჩილი მძღოლებიც გამოიკვეთნენ. კერძოდ, აღმოჩნდა, რომ სიჩქარის გადაჭარბებისთვის ყველაზე იშვიათად Cadillac-ის (5.4%), Tesla-ს (5%) და Volvo-ს (2.7%) მფლობელები ჯარიმდებიან.
წარმოგიდგენთ ავტომწარმოებლების ათეულს, რომელთა მძღოლებიც სიჩქარის გადაჭარბებისთვის ყველაზე ხშირად ჯარიმდებიან - მათ შორის მოდელების მიხედვით ყველაზე ხშირ და იშვიათ დამრღვევებს:
| ავტომწარმოებელი | დაჯარიმებული მძღოლები | ხშირად (მოდელი) | იშვიათად (მოდელი) |
| Infiniti | 8.70% | G37 (10.7%) | QX60 (5.2%) |
| Scion | 8.40% | FR-S (13.7%) | xA (4.3%) |
| Volkswagen | 8.30% | Golf GTI (11.1%) | Touragen (4.8%) |
| Subaru | 8.00% | WRX (13.6%) | Ascent (1.9%) |
| Mazda | 7.70% | MX-5 Miata (9.2%) | Mazda5 (4.3%) |
| Audi | 7.60% | S4 (14.6%) | SQ5 (1.5%) |
| Kia | 7.60% | Stinger (13.4%) | Soul EV (5%) |
| Honda | 7.50% | S2000 (10.8%) | CR-V (5%) |
| BMW | 7.40% | i3 (17.6%) | Z4 (4.5%) |
| Hyundai | 7.40% | Genesis Coupe (13.4%) | Santa Fe XL (3.9%) |
