აშშ-ის ტარიფებმა შესაძლოა ავტომწარმოებლების მოგება 17%-ით შეამციროს

ანალიტიკოსთა შეფასებით, ავტომწარმოებლებს, მათ შორის აშშ-ში დაფუძნებულ კომპანიებს ფინანსური პრობლემები შეიძლება შეექმნათ მას შემდეგ, რაც დონალდ ტრამპი დანაპირებს შეასრულებს და ქვეყანაში, იმპორტის ახალ ტარიფებს დააწესებს. 

S&P Global-ის მონაცემებით, ევროპული და ამერიკული ავტოკომპანიების წლიური მოგება შესაძლოა 17%-ით შემცირდეს. გარკვეულ ავტომწარმოებლებს, წლიური მოგების 20%-იანი ვარდნაც ემუქრებათ. 

ანგარიშის თანახმად, ყველაზე მეტად, GM-ი, Stellantis-ი, Volvo და Jaguar Land Rover-ი დაზარალდებიან. მათ შესაძლოა წლიური მოგების 20%-ზე მეტიც კი დაკარგოს. რაც შეეხება სხვა ავტომწარმოებლებს: VW-სა და Toyota-ს მოგება შესაძლოა 10%-დან 20%-მდე შემცირდეს, ხოლო BMW, Ford-ი, Mercedes-ი და Hyundai-Kia 10%-ზე ნაკლებით დაზარალდებიან. 

ტრამპი ოფიციალურად თანამდებობას 20 იანვარს დაიკავებს. თუმცა წინა საპრეზიდენტო დაპირებები მის შემდგომ ქმედებებზე უკვე ბევრს გვეუბნება. ერთ-ერთი პირველი გადაწყვეტილება, რომელსაც ის მიიღებს, იქნება მექსიკიდან და კანადიდან იმპორტირებულ საქონელზე 25%-იანი ტარიფის დაწესება. 

მიუხედავად იმისა, რომ აშშ, კანადა და მექსიკა ჩრდილოეთ ამერიკის თავისუფალი ვაჭრობის შეთანხმებაში (NAFTA) შემავალი ქვეყნები არიან, ტრამპის თქმით, ეს ზომები ნარკოტიკებისა და მიგრანტების გადმოსვლის წინააღმდეგ იქნება მიღებული. შეზღუდვები იმოქმედებს იმ დრომდე, სანამ საზღვრის დარღვევები არ აღიკვეთება. 

თუ ტრამპი თავის გეგმას მიჰყვება, საკმაოდ ბევრი ავტომწარმოებელი დაზარალდება. იგივე ეხება ევროპულ ბრენდებს, როგორიცაა BMW და VW, რომლებიც შესაძლოა, ყველაზე ცუდ სცენარში მოყვნენ და 20%-იანი ტარიფების წინაშე აღმოჩნდნენ. საინტერესოა ისიც, რომ ამ კომპანიების უმრავლესობას საწარმოები აშშ-ში აქვთ. აქედან გამომდინარე, S&P-ის ანგარიში, ამ საწარმოების ამერიკის ტერიტორიიდან გადატანასაც არ გამორიცხავს.