Pagani აშშ-ში Utopia-ს რვავე მოდელს უკან გაიწვევს

Pagani Utopia ლეგენდარული Huayra-ს მემკვიდრეა. ამ მოდელის მიწოდება ამერიკის შეერთებულ შტატებში ახლახან დაიწყო, თუმცა უკვე, მისი უკან გაწვევის საკითხიც დადგა. ხარვეზი ავტომობილის ხელსაწყოთა პანელშია აღმოჩენილი, რამაც, კომპანიის განცხადებით, შესაძლოა გავლენა მგზავრთა უსაფრთხოების მუშაობაზე იქონიოს.

იტალიური ავტომწარმოებლის ინფორმაციით, ხელსაწყოთა პანელში გამოყენებულ კარბონის ფორმას (ყალიბს) უხეში ზედაპირი აქვს. უსაფრთხოების ბალიშის ამოქმედებისას, ამ დეტალმა შესაძლოა ბალიში დააზიანოს და მისი ეფექტიანობა შეამციროს, რაც მგზავრის დაზიანების რისკს ზრდის. ერთი შეხედვით, შესაძლოა ეს პრობლემა უმნიშვნელო იყოს, თუმცა მსგავსად ძვირად ღირებული ავტომობილისთვის, ნებისმიერი ტიპის ხარვეზი სერიოზულ შედეგებს იწვევს.

Pagani-მ დეფექტი პირველად 2024 წლის 18 ნოემბერს აღმოაჩინა. მაშინ, როდესაც ტყავის ახალი ზედაპირის მქონე ხელსაწყოთა პანელს ამოწმებდა. კომპანიის გადაწყვეტილებით, მოდელისთვის ახალი ფორმა დამზადდება და ყველა უკვე წარმოებული და მიწოდებული ავტომობილი შეკეთებას დაექვემდებარება.

Pagani Utopia-ს წარმოება 2024 წლის 30 იანვარს დაიწყო და 19 ნოემბრამდე გაგრძელდა. ამერიკის შეერთებულ შტატებში მოდელის მხოლოდ 8 ეგზემპლარია მიწოდებული. გაწვევის გადაწყვეტილება თითოეულ მათგანს შეეხება.

მფლობელები და დილერები შეტყობინებას 2024 წლის 9 დეკემბრიდან 23 დეკემბრამდე მიიღებენ. დაზიანებული ავტომობილების ტრანსპორტირებასა და შეკეთებას დილერები თავად უზრუნველყოფენ. საჭიროების შემთხვევაში, Pagani ინჟინრებს იტალიიდანაც გაგზავნის, რომლებიც თავად გაუწევენ ზედამხედველობას შეკეთების პროცესს.

ამერიკის შეერთებულ შტატებში Pagani Utopia-ს ფასი $2.19 მილიონიდან იწყება. ავტომწარმოებელი მოდელის მხოლოდ 99 ეგზემპლარის გამოშვებას გეგმავს.