Lamborghini-ის მძღოლი სპეციალური „სუპერქარის“ ლიცენზიის არ ქონისთვის დაჯარიმდა

სამხრეთ ავსტრალიის შტატში, პირველ დეკემბერს, ახალი რეგულაცია ამოქმედდა. კანონმდებლობის თანახმად, მძღოლებს, რომლებიც მაღალი სიმძლავრის მანქანებს მართავენ, სპეციალური ლიცენზიის ფლობა ევალებათ. რეგულაციის ამოქმედებიდან ჯერ ერთი კვირაც არ გასულა და „სუპერქარის“ ლიცენზიის გარეშე ავტომობილის მართვისთვის პოლიციამ ერთი პირი უკვე დააჯარიმა.

სამხრეთ ავსტრალიის ხელისუფლებამ სპეციალური ლიცენზიის შემუშავება 2023 წელს დაიწყო - მას შემდეგ, რაც Lamborghini Huracan-ი 15 წლის ქვეითს შეეჯახა, რომელიც შემთხვევის ადგილზე დაიღუპა. კანონმდებლობით, ახალი „U“ კლასის ლიცენზია სავალდებულო ხდება ნებისმიერი იმ მანქანისთვის, რომლის წონაც 4 500 კილოგრამზე ნაკლებია, ხოლო სიმძლავრე 276 კილოვატს ან 370 ცხენის ძალას აღემატება.

დრო არც სამართალდამცველებს დაუკარგავთ და კანონის ამოქმედებიდან სულ რაღაც 7.5 საათში პირველი დარღვევაც აღმოაჩინეს. შავი Lamborghini Huracan STO 1 დეკემბერს დილის 7:30 საათზე გააჩერეს, ხოლო მძღოლი, რომელსაც შესაბამისი ლიცენზია არ ჰქონდა დაჯარიმდა. უცნობია, რა თანხა დაეკისრა მას, თუმცა პირველი დარღვევისთვის ჯარიმის მაქსიმალური ოდენობა $1 600-ია.

საინტერესოა ის, რომ Lamborghini Huracan STO-ს უკანა სანომრე ნიშანი არ ეკეთა. სწორედ ეს გახდა მისი გაჩერების მიზეზი. რო არა ეს ფაქტი, შესაძლოა პოლიციას კანონდარღვევა საერთოდაც ვერ აღმოეჩინა.

„სუპერქარის“ ლიცენზიის მიღება საკმაოდ მარტივია. ამისთვის მძღოლებს $40 ღირებულების ონლაინკურსის გავლა სჭირდებათ, რომელიც დაახლოებით 45 წუთს გრძელდება. შემდეგ კი ტესტი ბარდება.

სამხრეთ ავსტრალიის პოლიციის განმარტებით, კურსი მძღოლებს მაღალი სიმძლავრის მანქანების მართვას ასწავლის და ისეთი ტიპის რისკებზე ამახვილებს ყურადღებას, როგორიცაა: ელექტრონული სტაბილურობის კონტროლი, ავტომატური საგანგებო მუხრუჭი და სხვა ავტომატური სისტემები.