McQueen-ით შთაგონებული Ferrari California დატბორვის მიუხედავად გაიყიდა

რამდენიმე დღის წინ, Lightning McQueen-ის თემატიკით გაფორმებული Ferrari California აუქციონზე გამოჩნდა. მანქანის ექსტერიერი ერთი შეხედვით იდეალურ მდგომარეობაშია, თუმცა სტატუსად salvage-ი აქვს მითითებული, რაც ნიშნავს, რომ დატბორილია.

ამის მიუხედავად, ავტომობილი აუქციონზე გამოჩენიდან მალევე გაიყიდა. მანქანის Lightning McQueen-ის თემატიკის გრაფიკა და ექსტერიერი ვიზუალურად კარგად გამოიყურება, ბორბლებსა და მუხრუჭებსაც აშკარა დაზიანება არ ეტყობა, რაც საფუძვლიან ეჭვს ბადებს, რომ მათი აღდგენა ჯერ კიდევ შესაძლებელია.

Ferrari California სავარაუდოდ, „ჰელენეს“ ან „მილტონის“ შედეგად დაზიანდა. სტიქია ფლორიდის შტატს თავს რამდენიმე თვის წინ დაატყდა. დატბორვის დონის გათვალისწინებით, შანსია, რომ წყალს მანქანის სალონშიც შეეღწია. 

Copart-ის ვებ-გვერდზე მითითებული არაა ფუნქციურია თუ არა ეს ავტომობილი. თუმცა, ინსტრუმენტთა დაფიდან თუ ვიმსჯელებთ, ავტომობილში ელექტრონიკა კვლავ მუშაობს, რაც დადებითი ნიშანია. არსებობს შანსი, რომ Ferrari-ის V8-ც მუშაობდეს, გააჩნია, თუ რა დონეზე დააზიანა წყალმა ძრავა.

ცნობისთვის, Ferrari California-ს 4.3-ლიტრიანი ატმოსფერული ძრავა 454 ცხენის ძალას გამოიმუშავებს და მისი მძლავრი ხმის გამო განსაკუთრებით პოპულარულია. აღდგენის შემთხვევაში, ეს ძრავა შესაძლოა უნიკალური პროექტებისთვის, ან ამავე მოდელის დაზიანებული V8-ის შემცვლელად გამოდგეს.

მაგრამ არც ისაა გამორიცხული, რომ ახალი მფლობელი არა მანქანის ნაწილებად გაყიდვას, არამედ მის აღდგენას გეგმავდეს. ასეთ შემთხვევაში, Lightning McQueen-ის თემატიკის უნიკალურ სპორტულ ავტომობილს გზებზე კვლავ ვიხილავთ.