რა ემართება ჩინურ ელექტრომობილს ორი მანქანის შეჯახებისას?
ჩინური კომპანია Chery, როგორც ჩანს, საკუთარი ელექტრომობილების სანდოობაში მტკიცედ დარწმუნებულია, მომხმარებელთათვის ამის დამტკიცება კი, სამმაგი შეჯახების ტესტირებით გადაწყვიტა. ტესტირებისთვის ფირმამ 2025 წლის Exeed Sterra ES-ი გამოიყენა.
Chery-იმ შეჯახების სამმაგი ტესტირება მედიასაშუალებების წინ, ჩინეთის საავტომობილო ტექნოლოგიისა და კვლევის ცენტრის (CATARC) მხარდაჭერით ჩაატარა. განსხვავებით ტრადიციული შეჯახების ტესტებისგან, რომლებშიც სიმულატორები გამოიყენება, Chery-იმ რეალურ სიტუაციასთან მაქსიმალურად დასაახლოებლად, ნამდვილი ავტომობილები აირჩია.
ტესტირებისას, ელექტრომობილი უძრავად ერთ ადგილზე იყო გაჩერებული და მას, სხვადასხვა კუთხიდან, ორი მანქანა ეჯახებოდა. ორი, თეთრი ფერის Sterra ES-ი ელექტრომობილს 60 კმ/სთ-ის სიჩქარით შეეჯახა - ერთი, წინა მარჯვენა მხრიდან, 30-გრადუსიანი კუთხით, მეორე კი, პირდაპირ მგზავრის კარს, 180-გრადუსიანი კუთხით.
დაახლოებით 35 ტონის ზემოქმედების მიუხედავად, აღსანიშნავია, რომ Exeed Sterra ES-მა მგზავრების დაცვის ფუნქცია მაღალ დონეზე შეინარჩუნა.
როგორ დასრულდა ექსპერიმენტი? - პირველი, რაც შესამჩნევი იყო, მანქანის სტრუქტურული მდგრადობაა. უნდა აღინიშნოს ისიც, რომ შეჯახებისას უსაფრთხოების ყველა ბალიში დროულად გაიხსნა. ავტომატურად განიბლოკა კარებიც და საგანგაშო სიგნალის ფუნქცია გააქტიურდა. შეჯახების შედეგად, არ დაფიქსირებულა ბატარეის გაჟონვის ან ცეცხლის გაჩენის ფაქტი, ხოლო მაღალი ძაბვის სისტემა ავტომატურად გამოირთო.
შთამბეჭდავი შედეგების მიუხედავად, ყურადსაღებია რამდენიმე ფაქტორი, რომლებიც რეალურ სიტუაციაში თავს იჩენდა: მაგალითად ის, რომ დიდი ალბათობით, ავარიის დროს, Exeed Sterra ES-იც მოძრავ მდგომარეობაში იქნებოდა და ნაკლებად სავარაუდოა ის ფაქტიც, რომ ორივე მანქანა ელექტრომობილს ზუსტად ერთნაირი სიჩქარით შეეჯახებოდა.
აქედან გამომდინარე, შესაძლებელია დავუშვათ, რომ რეალურ სიტუაციაში შეჯახების შედეგები განსხვავებული გვექნებოდა.
ცნობისთვის, Exeed Sterra ES-ი ჩინურმა კომპანიამ 2003 წელს წარადგინა. მოდელი Huawei-ის მხარდაჭერით წარმოებული Luxeed S7-ს ბაზაზე შეიქმნა. ამ მოდელის 2025 წლის ვერსია 97.7 კვტ/სთ-ის ბატარეითაა აღჭურვილი და ერთი სრული დამუხტვით 900 კილომეტრზე მეტს გადის.
