Austin Powers-ის შთამბეჭდავი Shaguar-ი აუქციონზე იყიდება

Austin Powers-ი კომედიურ ჟანრში ერთ-ერთი გამორჩეული სერიალია, რომელიც იუმორისტული ხედვით საიდუმლო აგენტების იდეალიზებულ ცხოვრებას ასახავს. სერიალის წარმატება იმდენად დიდი აღმოჩნდა, რომ დენიელ კრეიგმა, რომელმაც ჯეიმს ბონდის როლი ხუთჯერ შეასრულა (2006-2021 წლებში), ინტერვიუში აღიარა, რომ მისი პერსონაჟი ლამის Austin Powers-ის გავლენის ქვეშ მოექცა.  

ამ პერსონაჟის შექმნა მაიკ მაიერსს უკავშირდება. მაიერსმა მისი კარიერა კომედიური მიმართულებით დაიწყო და მოგვიანებით პოპულარობაც თავისი ექსცენტრიკული პერსონაჟით მოიპოვა. მას მეუღლემ ამ პერსონაჟზე ფილმის გადაღება შესთავაზა და ასე დაიბადა Austin Powers: International Man of Mystery (1997). შემდეგ მოჰყვა Austin Powers: The Spy Who Shagged Me (1999) და ტრილოგია დაასრულა Austin Powers in Goldmember-ი (2002).

ასეთი გამორჩეული პერსონაჟისთვის შესაფერისი ავტომობილი იყო საჭირო, რომელიც გმირივით დასამახსოვრებელი იქნებოდა. პროდიუსერებმა და მაიკ მაიერსმა არჩევანი 1967 წლის დეკემბერში წარმოებულ Jaguar E-Type-ზე შეაჩერეს. თუმცა გადაწყვიტეს, რომ ამ მოდელის დიზაინი იუმორისტული გმირისთვის ზედმეტად ჩვეულებრივი იქნებოდა.

ამის გამო, მანქანა სრულიად გარდაქმნეს: კორპუსი Union Jack-ის დიზაინით დაიფარა, ხოლო Jaguar-ის უკანა ემბლემა Shaguar-ით შეიცვალა - ფილმში მაიერსის გმირის მახასიათებელი ფრაზით.

ფილმის შემდეგ Shaguar-ი მადონას მუსიკალურ ვიდეოში, Beautiful Stranger-შიც გამოჩნდა, სადაც მაიკ მაიერსიც მონაწილეობდა. ამის შემდეგ ავტომობილი უკვე კერძო კოლექციაში გადავიდა და მხოლოდ Jaguar-ის იშვიათ ღონისძიებებზე ჩნდებოდა ხოლმე.  

როგორც ვიცით, 2000-იან წლებში ავტომობილს კორპუსისა და ინტერიერის რესტავრაცია ჩაუტარდა. სულ ახლახან გავლილი სრული ტექნიკური მომსახურებით კი, მოდელი 2024 წლის იანვარში Mecum Auctions-ის აუქციონზე გაიყიდება.

მანქანის სავარაუდო ფასი ჯერ უცნობია. მაგრამ იმის გათვალისწინებით, რომ ის საკმაოდ იშვიათი მოდელია, მადონას ვიდეოშიც გამოჩნდა და Austin Powers-ის ტრილოგიისთვის სპეციალურად დამზადდა, სავარაუდოდ, ფასის შესაბამისი იქნება. აუქციონის სახლი მის 300,000 ევროს გაყიდვას ვარაუდობს. შესაძლოა, წლების შემდეგ Shaguar-ის ღირებულება ისეთივე მაღალი იყოს, როგორც ჯეიმს ბონდის Aston Martin DB5-ის. ამას მხოლოდ დრო გვიჩვენებს.