ავტომომობილები, რომელთა მექანიკურ ვერსიებს 2025 წელს ვეღარ ვიხილავთ
მექანიკური გადაცემათა კოლოფის მქონე ავტომობილები დღითიდღე ქრება. შემცირებული მოთხოვნა, გამონაბოლქვზე დაწესებული რეგულაციები - ეს და სხვა მიზეზები კომპანიებს წარმოების შეწყვეტისკენ უბიძგებს. გამორჩეული ამ მხრივ არც 2025 წელი იქნება და ჩვენ, უკვე გვაქვს იმ კონკრეტული მოდელების სიაც, რომელთა მექანიკურ ვერსიებსაც წელს უკვე აღარ ვიხილავთ:
Honda Civic Hatchback
მექანიკური გადაცემათა კოლოფის შეთავაზებას Honda, თავის Civic Si-სა და Type R-ის მოდელებში კვლავ აგრძელებს, თუმცა 6-სიჩქარიან ტრანსმისიას Civic Hatchback-ის საბაზო ვერსიაში ნამდვილად ვეღარ ვიხილავთ. ამ უკანასკნელში, 2025 წლიდან, მხოლოდ CVT-ტრანსმისია იქნება წარმოდგენილი, რომელიც Civic Hatchback Sport-ის შემთხვევაში, სტანდარტულ 2-ლიტრიან ძრავასთან ერთად, 150 ცხენის ძალას, ხოლო ელექტრიფიცირებულ 2-ლიტრიან ძრავასთან ერთად, ჰიბრიდულ ვერსიაზე, 200 ცხენის ძალას გამოიმუშავებს.
Jeep Gladiator
Gladiator-ი პიკაპებს შორის ერთ-ერთი უკანასკნელი იყო, რომელშიც მექანიკურ გადაცემათა კოლოფს ჯერ კიდევ ვხვდებოდით. თუმცა ახლა ეს შესაძლებლობაც გაქრა. 2025 წლის მოდელებიდან მექანიკური ტრანსმისიის ამოღება, Jeep-მა ჯერ კიდევ სექტემბერში დააანონსა. წლევანდელი სერია მხოლოდ 8-სიჩქარიანი ავტომატური გადაცემათა კოლოფით იქნება აღჭურვილი და სტანდარტულ 3.6-ლიტრიან V6 ძრავასთან ერთად, 285 ცხენის ძალას გამოიმუშავებს.
Kia Forte / K4
წლების განმავლობაში, მომხმარებელს, Kia Forte-ს მექანიკური ვერსიის შეძენის საშუალება ჰქონდა. თუმცა 2025 წლიდან Forte-ს სახელწოდება სრულად გაქრება, ხოლო მას ახალი K4 სედანი ჩაანაცვლებს. ამ უკანასკნელში კი, მექანიკური გადაცემათა კოლოფი აღარ იქნება. K4-ს სტანდარტულ მოდელს CVT-ტრანსმისია ექნება და 140 ცხენის ძალას გამოიმუშავებს. ხოლო GT-Line Turbo ვერსია 8-სიჩქარიან ავტომატურ გადაცემათა კოლოფსა და 190 ცხენის ძალას შემოგვთავაზებს.
Mini Cooper
ახალ ეპოქაში ვერც Mini-ის მექანიკურ ვერსიებს ვიხილავთ. 2025 წლიდან 6-სიჩქარიანი ტრანსმისია არც ერთ-ერთ ყველაზე პოპულარულ John Cooper Works-ში იქნება. ამის სანაცვლოდ, მოდელი, 7-სიჩქარიანი ავტომატური გადაცემათა კოლოფით აღიჭურვება, რომელიც საბაზო ვერსიაზე 161 ცხენის ძალას, ხოლო S-ვერსისთვის 201 ცხენის ძალას გამოიმუშავებს.
Volkswagen GTI
2025 წელს, მექანიკური ტრანსმისიას Volkswagen-ის ცნობილი და საყვარელი GTI ჰეჩბეკიც დაკარგავს. Volkswagen-მა ექვსსიჩქარიანი ტრანსმისია სტანდარტული 7-სიჩქარიანი ავტომატური გადაცემათა კოლოფით შეცვალა, რომელიც 2-ლიტრიან 4-ცილინდრიან ძრავასთან ერთად იქნება წარმოდგენილი და 241 ცხენის ძალას გამოიმუშავებს.
Volkswagen Golf R
GTI-ის მსგავსად, 2025 წლიდან არც Volkswagen Golf R-ის მექანიკური ვერსია იქნება ხელმისაწვდომი. Golf R-ში მხოლოდ 7-სიჩქარიან ავტომატურ გადაცემათა კოლოფს ვიხილავთ, რომელიც 2-ლიტრიან ტურბოძრავასთან დაწყვილდება და 328 ცხენის ძალას გამოიმუშავებს. ცნობისთვის, ეს ვერსია სრულად ამძრავი იქნება.
Volkswagen Jetta
როგორც ჩანს, რეგულაციებსა და შემცირებულ მოთხოვნას, 2025 წლიდან, ვერც Jetta-ს მექანიკური ვერსია გადაურჩება. წელს, ამ მოდელს ავტომწარმოებელი მარტო 8-სიჩქარიანი ავტომატური გადაცემათა კოლოფით შემოგვთავაზებს. თუმცა GLI-ის მექანიკური ვერსიის შეძენა მსურველებს კვლავ შეეძლებათ.
