მექანიკური ავტომობილები, რომელთა შეძენასაც 2025 წელს კვლავ შეძლებთ
სამწუხაროდ, არსებული რეალობიდან გამომდინარე, მექანიკური გადაცემათა კოლოფის მქონე ავტომობილები თანამედროვეობაში პოპულარობას კარგავს. შესაბამისად, წლების გასვლასთან ერთად, 6-სიჩქარიანი გადაცემათა კოლოფი სულ უფრო დიდი იშვიათობაც ხდება.
თუმცა მექანიკური ტრანსმისიის ეპოქა ჯერ არ დასრულებულა. თქვენი საყვარელი ავტომობილების მექანიკური ვერსიების შეძენას 2025 წელსაც შეძლებთ. მართალია სია შედარებით მწირია, ვიდრე გასულ წლებში, თუმცა არჩევანის საშუალებას მაინც გიტოვებთ.
Acura Integra და Acura Integra Type S
მომდევნო წელს მომხმარებელს Acura Integra-სა და Acura Integra მექანიკური ვერსიების შეძენა კვლავ შეეძლება. საბაზისო მოდელს 6-სიჩქარიანი გადაცემათა კოლოფი აქვს, რომელიც ძრავის სიძლიერეს მანქანის წინა ბორბლებზე ანაწილებს. მანქანა 2-ლიტრიანი ძრავითაა აღჭურვილი და 200 ცხენის ძალას გამოიმუშავებს. რაც შეეხება Type S-ს, მისი გამომუშავება 320 ცხენის ძალას აღწევს.
BMW M2, BMW M3, BMW M4
გერმანული ავტომწარმოებლის შემთხვევაში არჩევანი საკმაოდ მრავალფეროვანია. M2-ის 2025 წლის მოდელში კომპანია 6-სიჩქარიან მექანიკურ გადაცემათა კოლოფს და 3-ლიტრიან 6-ცილინდრიან ერთრიგა ძრავას გვთავაზობს, რომელიც 453 ცხენის ძალას გამოიმუშავებს. თუმცა, სურვილის შემთხვევაში, მომხმარებელს ამ მოდელის შეძენა 8-სიჩქარიანი ავტომატური გადაცემათა კოლოფითაც შეეძლება.
უკანა ამძრავი M3 Competition-ი 503 ცხენის ძალას, ხოლო უფრო ძლიერი M3 Competition xDrive 523 ცხენის ძალას უზრუნველყოფს. თუმცა ამ შემთხვევაში 8-სიჩქარიან ავტომატიკას უნდა დათანხმდეთ. მექანიკური ვერსიის შემთხვევაში კი, თქვენ შეგიძლიათ უკანა ამძრავი M3 შეიძინოთ - 473 ცხენის ძალის გამომუშავებით.
იგივე ეხება ახალ M4-ს. 2025 წლისთვის BMW უკანა ამძრავ M4-ს გთავაზობთ, რომელიც 473 ცხენის ძალას გამოიმუშავებს. შედარებით ძლიერია M4 Competition-ი და M4 Competition xDrive, რომელთა გამომუშავებაც 503 და 523 ცხენის ძალას აღწევს.
BMW Z4
BMW-იმ მომხმარებელს, 2024 წელს Z4-ის მექანიკური ვერსიაც შესთავაზა. 6-სიჩქარიანი გადაცემათა კოლოფის მქონე კაბრიოლეტი 3-ლიტრიანი, 6-ცილინდრიანი ერთრიგა ძრავითაა აღჭურვილი და 382 ცხენის ძალას გამოიმუშავებს. მაბრუნი მომენტი 500 ნიუტონ/მეტრია.
Ford Bronco
Ford Bronco იმ მცირე რაოდენობის SUV-ებს შორის ერთ-ერთია, რომელიც მექანიკურ ვერსიას კვლავ ინარჩუნებს. მექანიკური გადაცემათა კოლოფის მქონე ეს მოდელი 2.3-ლიტრიანი 4-ცილინდრიანი ძრავითაა აღჭურვილი და 300 ცხენის ძალას გამოიმუშავებს. 2.7-ლიტრიანი V6 ძრავით კი, ავტომობილის გამომუშავება 330 ცხენის ძალას აღწევს, თუმცა ის უკვე ავტომატიკაა.
Ford Mustang
2025 წელს მსურველები Ford Mustang-ის მექანიკური ვერსიის შეძენასაც შეძლებენ. ეს საკულტო ავტომობილი 6-სიჩქარიანი გადაცემათა კოლოფით კვლავ ხელმისაწვდომია - GT-ის შემთხვევაში ის 480 ცხენის ძალას, ხოლო Dark Horse-ის მოდელები 500 ცხენის ძალას გამოიმუშავებს. ცნობისთვის, მექანიკური GT-ის ფასი აშშ-ის ბაზარზე $48 000-ია, ხოლო Dark Horse-ის ღირებულება $65 000-ს აჭარბებს.
Hennessey Venom F5
მექანიკური ვერსია შენარჩუნდა ძვირად ღირებულ ამერიკულ სუპერქარშიც. Hennessey Venom F5 მსოფლიოში ყველაზე მაღალი წარმადობის მქონე მექანიკაა, რომელიც 1 817 ცხენის ძალას გამოიმუშავებს. ფასიც შესაბამისია: ამერიკული კომპანია თავის ჰიპერქარს $2.65 მილიონად აფასებს.
Honda Civic Si, Honda Civic Type R
თავისი საკულტო მოდელების მექანიკურ ვერსიებს ინარჩუნებს Honda-ც. Civic Si-ის შემთხვევაში კომპანია 1.5-ლიტრიან, 4-ცილინდრიან ძრავას გვთავაზობს, რომელიც 200 ცხენის ძალას გამოიმუშავებს. ხოლო Type R-ი კვლავ მხოლოდ 6-სიჩქარიანი გადაცემათა კოლოფით გვაქვს. ამ მოდელის 2-ლიტრიანი ძრავა 315 ცხენის ძალას გამოიმუშავებს.
Jeep Wrangler
საინტერესოა, რომ თავდაპირველად Jeep-ი ამ მოდელის ავტომატური ვერსიის წარმოებიდან სრულად ამოღებას და მხოლოდ მექანიკური ვარიანტების შენარჩუნებას განიხილავდა. თუმცა საბოლოოდ, კომპანიამ ორივე ვერსია წარმოებაში დატოვა. ორივე მათგანი სტანდარტული 3.6-ლიტრიანი V6 ძრავითაა აღჭურვილი.
Lotus Emira
Lotus-ის ხაზში, ერთადერთი მექანიკური ავტომობილი Emira-ს სპორტული მანქანაა. 6-სიჩქარიანი მექანიკური გადაცემათა კოლოფის მქონე მოდელი სტანდარტული 3.5-ლიტრიანი V6 ძრავითაა აღჭურვილი და 400 ცხენის ძალას გამოიმუშავებს.
