კორეელების EV-ბატარეა საკუთარ წარმოქმნილ ხანძარს თავადვე აქრობს
ელექტრომობილებისა და EV-ბატარეების ინდუსტრიამ ბოლო წლებში განვითარების მრავალი ეტაპი განვლო. თუმცა მეცნიერები გაჩერებას არ აპირებენ და ყოველდღიურად, ახალი გზების შემუშავებასა და ტექნოლოგიურ დახვეწაზე მუშაობენ. ეს ინოვაცია კორეელებს ეკუთვნით, კერძოდ კი Daegu Gyeongbuk Institute of Science and Technology-ის (DGIST) მკვლევრებს, რომელთაც EV-ების ბაზარს ინოვაციური ბატარეა წარუდგინეს.
კორეელების მიერ შემუშავებული EV-ბატარეა უნიკალური ორი მიზეზის გამოა: პირველი, მისი გამოყენების ხანგრძლივობაა, მეორე კი ის ფაქტი, რომ ამ ბატარეას, თავადვე შეუძლია საკუთარი წარმოქმნილი ცეცხლის ჩაქრობა. „ბატარეას ხანძრის ჩაქრობა შეუძლია და ძლიერ ზემოქმედებას მრავალციკლიანი დამუხტვის შემდეგაც ინარჩუნებს“, - აცხადებენ კორეელი მეცნიერები.
ტრადიციულ მყარი პოლიმერული ელექტროლიტის ბატარეებში, დამუხტვისა და განმუხტვის დროს, ლითიუმს მცირე, ხის მსგავსი სტრუქტურების ფორმირება შეუძლია, რომელსაც დენდრიტები ეწოდება. სახელი შესაძლოა უვნებლად ჟღერდეს, თუმცა რეალურად, დენდრიტებს, ბატარეების შიდა დამაკავშირებლების დაზიანების პოტენციალი აქვთ, რაც ხანძრისა და აფეთქების გამოწვევის საფრთხეს ქმნის. ეს ფაქტორი, წლების განმავლობაში, ლითიუმის ბატარეების პოტენციალის მაქსიმიზაციისთვის დაბრკოლებად რჩებოდა.
რეცენზირებული კვლევაში, რომელიც ახლახან გამოქვეყნდა, DGIST-ის გუნდმა დეტალურად აღწერა მათი ინოვაციური, სამშრიანი ელექტროლიტური სტრუქტურა, რომელიც ბატარეის უსაფრთხოებისა და მუშაობის გასაუმჯობესებლადაა შექმნილი. დიზაინი მოიცავს რბილ გარე ფენებს, რომლებიც ელექტროდებთან კონტაქტს აუმჯობესებს, ძლიერი შუა ფენა კი, ბატარეის სტრუქტურულ მთლიანობას აძლიერებს.
ხანძარსაწინააღმდეგო ეფექტისთვის, მეცნიერებმა, DBDPE, ეკოლოგიურად ცეცხლგამძლე საშუალება, ხოლო ბატარეის გასაძლიერებლად ლითიუმის მარილის მაღალი კონცენტრაცია გამოიყენეს. სპეციფიკა შეიძლება ტექნიკურად ჟღერდეს, შედეგი კი უფრო უსაფრთხო და საიმედო ბატარეაა.
ინოვაციები აქ არ სრულდება. კორეელების ახალი ბატარეის დიზაინი გამოყენების ხანგრძლივობითაც გამოირჩევა. 1 000-ჯერ დამუხტვისა და განმუხტვის ციკლის შემდეგ, ბატარეა მისი ეფექტიანობის დაახლოებით 88%-ს ინარჩუნებს. ეს მნიშვნელოვანი ზრდაა არსებულ ბატარეებთან შედარებით, რომლებშიც, იმავე სიხშირით გამოყენების შემთხვევაში, ეს მაჩვენებელი 20-30%-მდე მცირდება.
