შაკირამ ფანს გაფუჭებული Lamborghini აჩუქა
Barcelona-ს ყოფილ ფეხბურთელ ჟერარდ პიკესთან განქორწინების შემდეგ, შაკირამ იასამნისფერი Lamborghini Urus-ი შეიძინა - როგორც თავისუფლების სიმბოლო. ეს ავტომობილი შემდგომში უკვე კოლუმბიელი მომღერლის კლიპშიც გამოჩნდა, სახელწოდებით Soltera, რომელიც ასევე პიკესთან ურთიერთობას შეეხებოდა.
თუმცა ცოტა ხნის შემდეგ შაკირამ გადაწყვიტა, Lamborghini Urus-ი ერთ-ერთი თავისი თაყვანისმცემლისთვის გადაეცა. მომღერალმა ეს სოციალურ ქსელში გამოჩენილი გამოხმაურებისთვის მადლიერების ნიშნად გააკეთა. მომღერლის ბევრი გულშემატკივარი საუბრობდა იმ ინსპირაციაზე, რომელიც შაკირამ მათ პირადი ცხოვრებასთან დაკავშირებით მისცა.
„ეს ავტომობილი საჩუქარი იყო, რომელიც ჩემს თავს განშორების შემდეგ გავუკეთე. თუმცა ვთვლი, რომ მთავარი ადამიანური ურთიერთობებია - ავტომობილი, ტანსაცმელი და მატერიალური ნივთები არ გვცვლის. ჩვენ ის ადამიანები გვცვლიან, რომლებიც გვიყვარს და ის კავშირები, რომელთაც თავად ვქმნით“, - განაცხადა კოლუმბიელმა.
ავტომობილი გასული წლის ბოლოს, აშშ-ის 18 წელს გადაცილებულ მაცხოვრებლებს შორის გათამაშდა. მსურველები სპეციალურად ამ გათამაშებისთვის შექმნილ ვებ-გვერდზე დარეგისტრირდნენ. Lamborghini მაიკლ მეხიამ მოიგო, თუმცა მისი სიხარული ხანმოკლე გამოდგა. მეხია მალევე მიხვდა, რომ მისი Urus-ი „გაფუჭებული“ იყო.
Urus-ის ახალი მფლობელის განცხადებით, ძვირად ღირებული ავტომობილის მოგება მისთვის დიდი თავისტკივილი და ხარჯი აღმოჩნდა. ამის გარკვევის შემდეგ კი, შაკირამ, მას ნაღდი ფულით $90 000-ის ჩაურიცხა - ავტომობილის ხარჯების დასაფარად. მაგრამ ეს ამბავი საიდუმლოდ მაინც არ დარჩა.
მეხიას თქმით, მას ავტომობილის შეკეთება $95 000-ზე მეტი დაუჯდა, ამას დამატებული 6 თვის დაზღვევა: „ეს საკმაოდ ძვირია ჩემნაირი ფინანსური მდგომარეობის მქონე ადამიანისთვის. ცოტა სასაცილო სიტუაციაა, რადგან $90 ათასიც კი, რაც საკმაოდ დიდი თანხაა, საკმარისი არ აღმოჩნდა“.
აქედან გამომდინარე, მეხიამ ავტომობილის ბედიც უკვე გადაწყვიტა. მიუხედავად იმისა, რომ თავად მანქანის შენარჩუნება სურს - რადგან Lamborghini ყველაზე ძვირად ღირებული რამაა, რაც გააჩნია - ახლა მისი გაყიდვა აქვს გადაწყვეტილი. ასე, რომ შაკირას თავისუფლების სიმბოლოს უახლოეს პერიოდში აუქციონზე უნდა ველოდოთ.
