Volkswagen-ი, Stellantis-ი და 13 სხვა ავტომწარმოებელი ნახევარი მილიარდი ევროთი დაჯარიმდნენ
Volkswagen-ი, Stellantis-ი და დამატებით 13 სხვა ავტომწარმოებელი ევროპის კავშირის ანტიმონოპოლიური მარეგულირებელი ორგანოს მიერ დაახლოებით ნახევარი მილიარდი ევროთი დაჯარიმდნენ. ავტომწარმოებლებს ბრალი მანქანების გადამუშავების კარტელში მონაწილეობაში ედებათ.
ორგანიზაციის აღმასრულებელი ორგანოს განცხადებით, კარტელი 2002 წლის მაისიდან 2017 წლის სექტემბრამდე პერიოდში მიმდინარეობდა და მასში, ძირითადად ვადაგასული მანქანები იყო ჩართული. დაჯარიმებულთა შორისაა ავტომწარმოებელთა ასოციაციაც, რომელიც კომპანიებს შორის შეხვედრებს აწყობდა და მათ ერთმანეთს აკავშირებდა.
განმარტებისთვის, კარტელი პროდუქციის მიმწოდებლების გაერთიანებაა, ბაზარზე კონკურენციის შეზღუდვის მიზნით. მსგავსი ქმედება კი, ევროპული ორგანიზაციის წესდებას ეწინააღმდეგება, რომელიც ბაზარზე მონოპოლიების წარმოქმნას კრძალავს.
ორგანიზაციის კონკურენციის დამკვირვებელმა ორგანომ განაცხადა, რომ კომპანიები შეთანხმდნენ რეკლამირებაში ერთმანეთისთვის კონკურენცია არ გაეწიათ, სამაგიეროდ კი, დამალავდნენ ინფორმაციას იმის შესახებ, თუ რა რაოდენობის გადამუშავებული მასალა გამოიყენება ახალ მანქანებში.
კომპანიების ასევე შეთანხმდნენ არ გადაეხადათ ვადაგასული მანქანების გადამუშავების გადასახადი, რაც ასევე ორგანიზაციის კანონმდებლობის დარღვევაა. ევროპის კავშირის წესდება კომპანიებს ავალდებულებს დაფარონ გადამუშავების ხარჯები, რაც მფლობელებს ამ გადასახადისგან ათავისუფლებს.
„ჩვენ არ შევეგუებით რაიმე სახის კარტელის შექმნას, მათ შორის ისეთების, რომლებიც ჩვენ მომხმარებელს ინფორმაციასა და ეკოლოგიურად სუფთა პროდუქტებზე წვდომას უზღუდავს“, - განმარტა ორგანიზაციამ.
ჯარიმით ყველაზე მეტად Volkswagen-ი დაზარალდა, რომელსაც 128 მილიონამდე ევროს გადახდა მოუწევს, შემდეგ მოდის Stellantis-ი, 99.5 მილიონი ევროთი, ასევე დაჯარიმებულთა შორის მოხვდნენ - Renault-Nissan, Toyota, Mitsubishi, Honda, Hyundai, Jaguar Land Rover, Mazda, Suzuki, Volvo. კარტელში მონაწილეთა შორის იყო Mercedes-Benz-იც, თუმცა მან გამოძიებასთან თანამშრომლობით ჯარიმის თავიდან არიდება მოახერხა.
ცნობისთვის, მათი ჯარიმის 10%-ით შემცირების სანაცვლოდ კანონმდებლობის დარღვევაში მონაწილე ყველა ავტომწარმოებელმა დანაშაული აღიარა. რაც შეეხება ავტომწარმოებლების ასოციაციას, მას 500 000 ევროს ჯარიმა დაეკისრა.
