Honda საშუალებას გაძლევთ მისი სარბოლო ისტორიის ნაწილი გახდეთ

Honda ახალ საქმიანობას იწყებს. ავტომწარმოებელი ცნობილი სარბოლო ავტომობილების ნაწილებს, ხელმოწერილ და იშვიათ ნივთებსა და მერჩებს, მათთან ერთად კი, თავად სარბოლო მანქანებსაც გაყიდის. ავტომწარმოებლის ახალი ბიზნესი Honda Racing Corporation-დან დაიწყება, რომლის ფარგლებშიც მონტერეის საავტომობილო კვირეულის დროს, აგვისტოში, აუქციონზე ლეგენდური აირტონ სენას Formula-1 ბოლიდის ძრავის ნაწილები გამოვა.

ავტოსპორტი მსოფლიოს მრავალი უმსხვილესი საავტომობილო კომპანიისთვის, ყოველთვის, მნიშვნელოვანი მიმართულება იყო. Honda-მ კი Formula 1-ის ისტორიის გულშემატკივრებისთვის ამ გამოცდილების გაზიარება გადაწყვიტა. 1990 წელს, Honda-ს ძრავაზე მომუშავე McLaren-ით ჩემპიონატის მოგების შემდეგ, სენამ განაცხადა, რომ RA100E F1-ის ძრავა დაშალეს და ცალ-ცალკე ყუთებში შეინახეს. ახლა სწორედ ეს ნაწილები გულშემატკივრებისთვისაც ხელმისაწვდომი ხდება. 

სენასა და ზოგადად, Formula 1-ის მოყვარულებს შესაძლებლობა ექნებათ ისეთი კომპონენტები, როგორებიცაა მანაწილებელი ლილვები, დგუშები და ბარბაცები თავისივე სახლში, კედელზე ჩაქუჩით დაამაგრონ. ასე, რომ F1-ის ფანები ახლა საკუთარ სახლში McLaren-ის ბოლიდის სურათის გვერდით, ძრავის ნაწილებსაც განათავსებენ.

სენას ბოლიდის ძრავის გარდა, იაპონური ბრენდი თავისი კოლექციიდან კიდევ არაერთი ნივთის გაყიდვას გეგმავს. ამჟამად Honda მანქანებს არჩევს, რომლებიც წარსულში IndyCar-ის სერიებში გამოიყენებოდა, ხოლო სამომავლოდ, აუქციონზე შესაძლოა კლასიკური მოტოებიც ვიხილოთ. ეს სიახლე ალბათ კოლექციონერებსა და ენთუზიასტებს ძალიან გაახარებთ.

„ჩვენ გვსურს F1-ის, MotoGP-ისა და სხვა რბოლების მოყვარულებს გავუზიაროთ ის გამოცდილება და გამოწვევები, რომელთაც Honda 1950-იანი წლებიდან მოყოლებული, რბოლებში აწყდებოდა“, - განაცხადა HRC-ის პრეზიდენტმა კოჯი ვატანაბემ. „ჩვენი წამოწყება, მივცეთ ჩვენ გულშემატკივრებს შესაძლებლობა Honda-ს სარბოლო ისტორიის ნაწილებს ფლობდნენ, ერთჯერადი ხასიათის არაა. ეს უწყვეტი ბიზნესია, რომელსაც ჩვენ გავზრდით და გავზრდით“.