პირველად, Audi-ს საკულტო სარბოლო მანქანების შეძენა თქვენც შეგიძლიათ

ნამდვილი სარბოლო მანქანების ენთუზიასტებისთვის, Audi ახალ პროგრამას იწყებს. ავტომწარმოებელი მისი ავტომობილების მოყვარულებს აძლევს შანსს შეიძინონ რეალური და გამოცდილი სარბოლო მანქანები, რომლებიც აღდგენილია და გზებზე დასაბრუნებლადაც მზადაა. და ეს ძველი ნარჩენები არ გეგონოთ, რადგან Audi ახალ პროგრამას იწყებს ორი მანქანით, რომლებიც ერთ დროს პოდიუმებს იპყრობდნენ.

Audi Sport Racing Legends - ასე ეწოდება ახალ წამოწყებას, რომელიც ზუსტად ისეთია, როგორც ჟღერს. პროგრამის ფარგლებში, ძველი სარბოლო ავტომობილების შეძენას რიგითი მოქალაქეებიც შეძლებენ. თუმცა მხოლოდ ფული ამისთვის საკმარისი არ იქნება, რადგან Audi თავად გადაწყვეტის ვინ იქნება ღირსი, მისი საკულტო მანქანის გასაღები მიიღოს. ისინი ეძებენ მყიდველებს, რომლებიც აფასებენ მემკვიდრეობას და არა მხოლოდ ცხენის ძალას.

Audi პროგრამას ორი ცნობილი მანქანის გაყიდვით იწყებს. მათგან ალბათ გამორჩეული R18 e-tron Quattro-ა, შასი 207. ზუსტად ის მოდელი, რომელმაც WEC Spa-Francorchamps-ზე FIA-ს 2012 წლის  მსოფლიო გამძლეობის ჩემპიონატი მოიგო და იმავე ტიპისაა, რაც 2012 წლის ლე მანსის გამარჯვებული.

გარდა ამისა, პირველ ეტაპზე ავტომწარმოებელი RS 5 DTM-საც გაყიდის, შასით 107, რომელმაც 2015 წლის DTM-ის ფინალი მოიგო. Audi-ს განცხადებით, ახალ მფლობელებს მანქანების მდგომარეობის შესახებ სანერვიულო არ აქვთ, რადგან თითოეული მათგანი მკაცრი სტანდარტებისა და მაღალი დონის ექსპერტიზის მიხედვითაა აღდგენილი.

მათივე შეფასებით, ეს უფრო მეტია ვიდრე გარიგება: ეს არის ელიტარულ ჯგუფში გაწევრიანებაა: „Audi R18 e-tron quattro და RS 5 DTM  ორი ყველაზე სწრაფი სარბოლო მანქანაა, რომლებიც ჩვენ ოდესმე შეგვიქმნია. ასე, რომ მომხმარებელს ვურჩევთ, ძალიან მოთხოვნად სარბოლო მანქანებთან  ერთად, მათი მართვის დაუვიწყარი გამოცდილებისთვისაც მოემზადონ“. ამასთან ერთად, Audi მძღოლებს მუდმივ მხარდაჭერასაც ჰპირდება, იმ შემთხვევაში თუ ისინი მანქანების ტრასებზე დაბრუნებას გადაწყვეტენ.