Xiaomi SU7-ის პირველი ფატალური ავარია, თვითმართვად ტექნოლოგიაზე ეჭვებს აჩენს

ჩინური Xiaomi ელექტრომობილების გლობალურ ბაზარზე ამერიკული Tesla-ს მთავარი კონკურენტია. ახლა კი ის ახალი ამბების მთავარ განსახილველ საკითხადაც გვხვდება, თუმცა არა კარგი მიზეზით. რამდენიმე დღის წინ, Xiaomi SU7-ის პირველი ფატალური ავარია დაფიქსირდა, რომელსაც სამი ადამიანის სიცოცხლე შეიწირა. ამ ავარიამ პირველ რიგში კითხვები ჩინური Xiaomi-ის მძღოლის დამხმარე თანამედროვე სისტემების უსაფრთხოებისა და საიმედოობის შესახებ გააჩინა.

უბედური შემთხვევა 29 მარტს მოხდა. ავტომობილი, რომელშიც სამი მგზავრი იმყოფებოდა, ჩართული ნავიგაცია-ავტოპილოტის (NOA) სისტემით მოძრაობდა, სტაბილური 116 კმ/სთ-ის სიჩქარით. ამის შემდგომ, ელექტრომობილი სამშენებლო ზონაში შევიდა, ბარიერებით გადაკეტილ შესახვევს მიუახლოვდა და ბეტონის გამყოფს 97 კმ/სთ-ით დაეჯახა. შეჯახების შედეგად, EV-ს ცეცხლი გაუჩნდა, რომელმაც ავტომობილი სრულად მოიცვა.

ავარიიდან მალევე, Xiaomi-მ ავტომობილის მარშრუტის შესახებ დეტალური ინფორმაცია გამოაქვეყნა. ავტომწარმოებლის ინფორმაციით, 22:44:24 საათზე, SU7-ის სისტემამ მძღოლი ხმოვანი სიგნალით გააფრთხილა: „წინ დაბრკოლებაა“ და დამუხრუჭება დაიწყო. ერთი წამის შემდეგ, მძღოლმა საჭეზე კონტროლი გადაიბარა, დამუხრუჭება გაზარდა და მანქანას მიმართულება რამდენჯერმე შეუცვალა. მიუხედავად ავარიის თავიდან აცილების აშკარა მცდელობისა, მანქანა ბეტონის ბარიერს დაეჯახა.

შეჯახების შედეგად, eCall-ის საგანგებო სისტემა SU7-ის რეგისტრირებულ მფლობელს დაუკავშირდნენ და გაირკვა, რომ ის ავტომობილს თავად არ მართავდა. სასწრაფო დახმარება ადგილზე დაახლოებით 23 საათზე მივიდა, თუმცა მგზავრების გადარჩენა ვერ მოხერხდა.

Xiaomi გამოძიებასთან აქტიურად თანამშრომლობს. ჩინური მედიის ინფორმაციით, ერთ-ერთი მსხვერპლის მამას ადგილობრივმა პოლიციამ განუცხადა, რომ მანქანის გასაღებით შეჯახების შემდეგ კარების გაღება ვერ მოხერხდა. უბედური შემთხვევის შემდეგ, კომპანიის აქციების ფასი 5%-ით დავარდა. Xiaomi-ის აღმასრულებლების განცხადებით, ავარიის მიზეზები აუცილებლად გამოვლინდება.