Udabno Rally Raid 2025 | 12-13 აპრილს საქართველოში უდაბნო რალი რეიდი ჩატარდება

ექსტრემალური სპორტის მოყვარულთათვის გარეჯის უდაბნოს ტერიტორიაზე 12-13 აპრილს Udabno Rally Raid 2025 გაიმართება. ეროვნული ბაჰას თასი „სათავგადასავლო რალი საქართველოს“ ორგანიზებით და FIA-ს სპორტული კოდექსის, შეჯიბრების რეგლამენტის და ტექნიკური მოთხოვნების შესაბამისად ჩატარდება.

საქართველოში ყველაზე ექსტრემალური და დინამიკური რალი-რეიდი წელს საერთაშორისო მასშტაბზე გადის. Udabno Rally Raid-ში მონაწილე საუკეთესო ოფ-როუდ მრბოლელები და შტურმანები ერთმანეთს 250-კილომეტრიან სპეციალურ მონაკვეთზე, გრუნტიან და ქვიან რელიეფზე, ხუთ ძირითად კატეგორიაში შეეჯიბრებიან:

მოტოციკლები T1.
კვადროციკლები T2.
სერიულად წარმოებული ბაგები SSV T3.
სერიულად წარმოებული ძარიანი ავტომობილები T4.
არასერიული სპორტული ავტომობილები (პროტოტიპი) T5.

Udabno Rally Raid 2025 „სათავგადასავლო რალი საქართველოს“ პროექტია, რომელსაც და-ძმა ვერა და გიგა მურღულიები უკვე მეექვსე წელია უძღვებიან. „Udabno Rally Raid-ი მხოლოდ სპორტული შეჯიბრება არაა, უდაბნო რალი არის ადამიანისა და მანქანის გამოცდა - დროისა და რელიეფის წინააღმდეგ“, - აცხადებენ ორგანიზატორები.

რალისთვის კახეთისა და ქვემო ქართლის ტერიტორიაზე მოწყობილი სპეციალური ტერიტორია 5-კილომეტრიანი პროლოგისგან, 180-კილომეტრიანი და 62-კილომეტრიანი უდაბნოს მონაკვეთებისგან შედგება. რალიში ნავიგაცია არა GPS-ის, არამედ FIA-ს სტანდარტებით შექმნილი საგზაო წიგნით ხდება, რაც დაკარის რალიში გამოყენებული პრაქტიკის ანალოგიურია. ეს მრბოლელებს საშუალებას აძლევთ გამოცადონ, როგორც მართვის, ასევე ნავიგაციის უნარები.

Udabno Rally Raid-ის მრბოლელები კატეგორიების შესაბამისად, კლასების მიხედვით დაიყოფიან - თითო კლასში მინიმუმ 8 მონაწილით. შედეგების სიაში მოსახვედრად მონაწილეებს ეტაპის სულ მცირე 25%-ის დაფარვა მოეთხოვებათ. დაჯილდოების ცერემონია 13 აპრილს 19:00 საათზე გაიმართება.

ღონისძიებაზე უსაფრთხოების სტანდარტები წელს განსაკუთრებით გამკაცრებულია. რალიში მონაწილე ყველა მანქანა თუ მოტოციკლი აღჭურვილი იქნება GPS-ის უსაფრთხოების „თრექინგ“ სისტემით, რაც მრბოლელებს შორის უსაფრთხო და სამართლიან კონკურენციას შექმნის. გარდა ამისა, შეჯიბრებაში მონაწილეთა უსაფრთხოებას გამოცდილი მსაჯთა გუნდი, სასწრაფო სამედიცინო დახმარების ბრიგადა და სპეციალური ვერტმფრენი უზრუნველყოფს.

ინფორმაციისთვის, Udabno Rally Raid-ი საქართველოში ყოველწლიურად იმართება. მიმდინარე წლის ღონისძიებაში მონაწილეობისთვის რეგისტრაცია უკვე დასრულებულია, 2026 წლის შეჯიბრებისთვის რეგისტრაცია კი, 2025 წლის 10 ივნისს გაიხსნება.