Maserati MC20: იტალიური ლეგენდის აღზევება

MC12 ერთ-ერთი საუკეთესო „მაზერატია“, რომელიც ოდესმე ადამიანს უნახავს, თუმცა მალე ახალი მოდელის გამოშვება იგეგმება.

მიუხედავად იმისა, რომ MC12  Ferrari Enzo-ს ბაზაზე იყო აწყობილი, ავტომობილი თავისი დიზაინით, ფორმებით და სარბოლო ხასიათით გამოირჩეოდა. MC12-ის ხიბლს ამ ყველაფერთან ერთად შუაში მოთავსებული 630- ცხენისძალიანი V12 ძრავა განაპირობებს.

 „მაზერატიმ“ იტალიური ლეგენდის აღზევებასთან დაკავშირებით, სამომავლო გეგმები  წარადგინა. ახალ ფლაგმანურ ავტომობილს MC20 უწოდეს.

MC20 შემდეგნაირად იშიფრება: Maserati Corse 2020. კომპანიის განცხადებით, 2020 მათთვის გარდამტეხი წელია, რადგან მათი ისტორიის ახალი ფაზა იწყება. ჯერჯერობით სურათები ქსელში არსად გავრცელებულა, თუმცა 2019 წლის ნოემბერში ერთ-ერთმა იტალიურმა კომპანიამ „მოდენამ“ სატესტო ავტომობილის სურათი ატვირთა, რომელიც, მათი თქმით, 100% „მაზერატია“.

 

დიზაინზე დანამდვილებით ვერაფერს ვიტყვით, თუმცა ის, რომ ახალი „მაზერატი“ თავიდან ბოლომდე „მაზერატის“ მიერ შემუშავებული და შექმნილი იქნება, უკვე დამტკიცებული ინფორმაციაა. ახალი M20 აღარ იქნება Ferrari-ის შასიზე აწყობილი.

„მაზერატი“ აცხადებს, რომ MC20 MC12-ის „ბუნებრივი ევოლუცია“ იქნება, თუმცა ეს იმას არ ნიშნავს, რომ ძრავის კონფიგურაცია აუცილებლად შეიცვლება. ამაზე დეტალური ინფორმაცია სამომავლოდ გამოქვეყნდება, თუმცა ბოლო პრეს-რელიზზე დაყრდნობით, ახალი ავტომობილი „ტექნოლოგიებით გატენილი“ იქნება და ელექტრო ვერსიაც კი მოსალოდნელია.

კომპანიამ უკვე დაამტკიცა, რომ ანალოგიურად MC12-ის GT1-ის ბოლიდისა, MC20 სარბოლო ვარიანტი იქნება.

„მაზერატი“ აცხადებს, რომ M20 „მოდენაში“ აიწყობა, რაზეც საწარმოს მოდერნიზირებისთვის ჩადებული ინვესტიციების საგრძნობი თანხები მიუთითებს. უფრო დეტალურ ინფორმაციას კი კომპანია მარტში ჟენევას მოტორ შოუს პერიოდში გამოაქვეყნებს.