ოფიციალურად: 2021 წლიდან ფერნანდო ალონსო ფორმულა 1-ში ბრუნდება
ფერნანდო ალონსო ფორმულა 1-ში „რენოს“ გუნდში ბრუნდება. ის 2-წლიან კონტრაქტს გააფორმებს.
2021 წლიდან ორგზის მსოფლიო ჩემპიონი ფერნანდო ალონსო ფორმულა 1-ში ბრუნდება ! ის „რენოს“ გუნდში დენიელ რიკიარდოს ადგილს დაიკავებს. რიკიარდო „მაკლარენში“ გადადის, ალონსოს პარტნიორი კი ესტებან ოკონი იქნება.
„რენოს“ გუნდს ალონსო პირველად 2003 წელს შეუერთდა და 2006 წლამდე დარჩა. მან 2005 წელს და 2006 წელს მსოფლიო ჩემპიონის ტიტული მოიპოვა. მეორედ ის ამ გუნდში 2008-2009 წლებში იყო.
2021 წლის ივლისში ესპანელს 40 წელი შეუსრულდება. მიუხედავად იმისა, რომ ბოლო ათი წლის განმავლობაში „რენოს“ გუნდში ბევრი ცვლილება მოხდა, გუნდის ზოგიერთ წევს ფერნანდო ალონსო კარგად იცნობს, მათ შორის სპორტულ დირექტორ ალან პირმეინს.
ალონსო ასევე კარგად იცნობს გუნდის ამჟამინდელ ტექნიკურ დირექტორ პეტ ფრაის, რომეთანაც „ფერარისა“ და „მაკლარენში“ თანამშრომლობდა.
რამდენიმე დღის წინ გუნდის ხელმძღვანელმა სირილ აბიტბულმა განაცხადა, რომ „რენო“ კანდიდატებთან მოლაპარაკებებს აწარმოებდა.
- „ჩვენ სწრაფ პილოტს ვეძებთ, თან ისეთს, რომელიც ჩვენს გუნდს კარგად იცნობს. ჩვენ ფორმულა 1-ში უნიკალური გუნდი ვართ. ჯერ კიდევ ახალგაზრდა. განვითარების პროცესში ვართ. ისეთი ადამიანი გვჭირდება, რომელსაც ეს ყველაფერი კარგად ესმის. არ ვამბობთ იმას, რომ რიკიარდოს ეს არ ესმოდა. ჩვენ მომავალზე ვსაუბრობთ“. - თქვა მან.
წინა კვირას ოკონს ჰკითხეს, რას ფიქრობდა ალონსოს გუნდელობაზე და მან უპასუხა, რომ გაუხარდებოდა, თუ ეს მოხდებოდა.
- „ჩემი სურვილი გუნდის გადაწყვეტილებაზე გავლენას არ მოახდენს. ფერნანდოსთან შესანიშნავი ურთიერთობა მაქვს. ერთადერთი, ვისაც ჩემი ჩაფხუტი გავუცვალე, სწორედ ის იყო. შუმახერთან ერთად, ალონსო იყო ის, ვინც ეს სპორტი შემაყვარა. არ ვიცი დაბრუნდება თუ არა, მაგრამ, თუ ასე მოხდება, მე ძალიან გამიხარდება“. - თქვა ოკონმა.
ახლა კი ფერნანდო ალონსოს „რენოს“ გუნდში დაბრუნება ოფიციალურად დადასტურდა. პასუხგაუცემელი კი ერთი მთავარი კითხვა რჩება: სად წავა სებასტიან ფეტელი? როგორც ამბობდნენ, მას მხოლოდ ორი გზა ჰქონდა: Renault-ი და სახლი. „რენოში“ ადგილები შეივსო. ნიშნავს ეს რომ ფეტელი სახლში მიდის? ეს ჯერ არავინ იცის.
